බාඳුරා අසපුව ... !!



බවුන් වඩන්නට ..

සොයා ගිය අසපුව ..
ලේ මස් නහර ..
මටත් නොදැනිම ..
හූරා උරා ගත් ..
බාඳුරා අසපුවක් වූ කලෙක ..
බිහිවුන අතුරු ඵලයයි ..
බාඳුරා අසපුව ... !!


Sunday, December 1, 2013

~ දෙසැම්බර් හීතල ~






මේ ජීවිතේ විසි අට වෙනි වතාවටත් දෙසැම්බර් හීතල මාව බලන්න ඇවිත්. දෙසැම්බර් හීතල අමුතුයි. හීන් අයිස් ඉදිකටු දාහකින් ඇඟට අනිනවා වගේ දැනෙන, හම පසාරු කරගෙන හිතට ආත්මයට කතා කරන, ලොකු හීතල පොරෝනාවකින් මගේ රිදෙන හිත වහලා දාන, පාලු තෙත හීතලක් ඒක. 

තනිකමේ නිහැඩියාවෙන් හැඩ උන දෙසැම්බර් හීතල තරම් ලස්සන සාමකාමී දෙයක් මම කවදාවත් දැකලා නෑ. 

මම දෙසැම්බර් හීතලට ආදරේ ඒ නිසයි.

නත්තල් හීතල මගේ හිතේ මවන්නේ අපූරු පින්තූර. එක යායට විහිදුනු හිම කන්දක්, බැලූ බැලූ අත සුදු පාට මිස වෙන මුකුත්ම නෑ. ඒ හිම යාය උඩ.. මුදුනෙම .. හමාගෙන එන මහ හුළගට මූණ දීගෙන ඉන්නෙ මම. ෆැන්ටසි ලෝකෙදි මට දිගම දිග කොන්ඩයක් තියෙනවා ;) ඒක හුලගට යනවා අස්ස වලිගයක් වගේ. මම බෙරිහන් දීලා කෑ ගහනවා හුලගට. මගේම සද්දේ මගේම කන් ඇතුලේ දෝංකාර දෙනකන්. කෑ ගහලා කියනවා මම හිතේ තියෙන හැම දෙයක්ම, ඔලුව පුපුරන්න ගොඩ ගැහිලා තියෙන හැම වදකාර හිතුවිල්ලක්ම.

අඩා වැටෙනවා මම හිතේ හැටියට ඒ හිම කන්ද උඩ දණින් වැටිලා. දෙනෝ දාහක් දෙනා රිදෝපු, හැම මතකයක්ම කදුලු එක්ක දිය වෙලා පුංචි දිය කඩිත්තක් හැදෙනකන්. පිටිපස්සෙන් ඇවිත් පිහියෙන් ඇන්න උන්ගේ කැපුම් පාරවල් වලින් ගලන ලේ හෝදගෙන යනකන්. ඒ ලේ වලින් පුංචි පොයින්ට්සෙටියා මල් පිපෙනකන් කදුලු වැටිලා හැදුනු දිය කඩිත්ත ඉවුරේ. 

දිය කඩිත්ත විලක් වෙනකං, විල ගගක් වෙනකං, හිත හැදෙනකං, එක දිගට අඩනවා මම. කවුද දන්නේ, සමහර විට සුරංගනාවියෝ ඒවි ඒ විල ඉවුරට. ලේ වලින් පිපුනු මල් නෙලාවි දිව්‍ය ලෝකේ යද්දි ගෙනියන්න. 



දුයිෂෙන් කිව්ව වසන්තය එනකන් බලාගෙන ඉන්න අල්තිනායිලා ඉන්න ලෝකෙක, මම බලන් ඉන්නේ නත්තල් හීතල එනකන්. රිදෙන පිච්චෙන ජීවිතේ අයිස් පොරෝනාවකින් වහලා දාලා මාව තාවකාලික නින්දකට ඇදලා දාන ලේ මිදෙන හීතල එනකන්. වසන්තය එනවමයි කියලා දුයිෂෙන් තවුසන්ඩ් ටෝක්ස් දීලා තියෙන නිසා වසන්තය එන එකක් නෑ කියන ෆැන්ටසියේ ඉන්න මට බෑ. ඒ නිසා පුලුවන් තරම් දිග කාලයක් හීතල තිබේවා, වසන්තය පුලුවන් තරම් පරක්කු වේවා කියන ප්‍රාර්ථනය හැම දෙසැම්බරයේදිම මගේ හිතට එනවා.

දෙසැම්බර් හීතල ..
පැමිණ වැළදගන්
මගේ හිත ..
ගත ..
මුලු ආත්මය ..
ඉඩ නොදී
එක සිතුවිල්ලකට
රිදුමකට ..
සත්තමයි ..
උවමනා නෑ මට ..
වසන්තය ..
හිම දිය කරන
මිදුනු හිත පණ පොවන..
ඇවැසි නෑ මට
වසන්තය
ඉන්න තුරු ඔබ මා සමග
ජීවිතය..
හීතලෙන් වෙලාගෙන..



Monday, September 16, 2013

පොත් පින්තූර 2013

මුකුත් ලියන මූඩ් එකක් නෑ..
ඒ නිසා දැනට පොත් ටික විතරක් අතාරින්නම් බලා ගන්න.

ඔන්න ඇනෝලට කලින්ම කියන්නේ..
මේ පින්තූර පල කරන එකේ බලාපොරොත්තුව මම මහා පොත් ගොඩක් කියවන පොරක් කියලා පෙන්නීම එහෙම නෙමේ..
ෆේස් බුක් වගේ සමාජ සම්බන්ධතා ජාල වාරණය කල රටවල් වල ඉන්න වගේම මට එදිනෙදා මුණ නොගැහෙන .. ඒත් පොත් වලට මම තරම්ම ආදරය කරන මගේ යාලුවන්ට මගේ පොත් අස්වැන්න පෙන්නන්න විතරයි මට ඕන ..
ඒ අය කොහෙ හිටියත් මේව දැකලා සතුටු වෙයි ..
මට ඕන එච්චරයි ..



























Sunday, July 28, 2013

මගේ මළගම ..




මම මළදාක ..
අද හෙට කෙදිනක ..
ඇවැසි නැහැ මට ..
මූණ පෙන්නන්න ලයිට් කණුවල ..
උපත .. විපත ..
ඒ මැද දත් විරිත්තගෙන මම ..
මතක් වෙනකොටත් ..
විකාරයි මට ..
බලාගෙනයි ඇලෙව්වොත් ..
එක මරණ දැන්වීමක් ..
මගෙ නමට ..

මම මළදාක ..
අද හෙට කෙදිනක ..
එක ශෝක ප්‍රකාශයක්
එල්ලනවා හෙම නෙමෙයි ..
මගේ නමට ..
අඩන ඇස් වලින් පිරුනු ..
දාහක් මකර තොරන් ..
"යලි අප අතරම ඉපදේවා .."
"නිවන් සැප ලැබේවා .."
මොන මඟුලක්ද මන්දා ..
නිවන් සැප ලැබුනොත් ..
කොහොම යලි ඉපදෙන්නද ..
ගෙයි බිත්ති වහගෙන ..
වතුපිටි වැටවල් පුරෝගෙන ..
පෝස්ටර් බැනර්..
එල්ලනවා හෙම නෙමේ ඔන්න ..
නිකරුනේ නාස්ති නොකර ..
දීල දැම්මම ඉවරයි ..
සුදු රෙදි ටික ..
සිල් රෙදි හදා ගන්න ..
උපාසකම්මෙක්ට ..

මම මළදාක ..
අද හෙට කෙදිනක ..
තේක්ක පෙට්ටි ඕන නෑ මට ..
සැටින් කවර ඕනත් නෑ මට ..
පෙට්ටියේ අස්සට මොන එහෙකටද පුලුං මට ..
රබර් ලීයෙන් හදපු, පිදුරු දාපු පෙට්ටියක් ..
අපොයි හොදටම ඇති නිදියන්න ..

මම මළදාක ..
අද හෙට කෙදිනක ..
"අද අපෙන් වෙන් වෙන ..
සත්ගුණවත් දියණිය ..
පින්බර කුළ කුමරිය .."
~ මළවුන් හිනස්සනෙපා ඔන්න .. ~
ජීවිතේට සත් ගුණවත් නොවුනු මට ..
හෙළ කුළයක් ගෑවුනු තැනක නැති මට ..
මොන එහෙකටද බොරු නම්බු නාම ..
රෙද්දක් කතා නොකර .. 
වයධම්මා සංඛාරා කියලා ..
පාංශුකූලේ දුන්නම ඇති හොදටම ..
බොරු සැර පූචානම් නැතුව ..

මම මළදාක ..
අද හෙට කෙදිනක ..
පෙරහැර එපා මට ..
මල් වඩම් ලයිට් වැල් ..
එපා මට මග දිගට ..
පෑගෙන්න ඉහන පොරි ..
දෙන්න මාලුන්ට, පරවින්ට ..
මැරුණු කය පුලුස්සපු ..
අලු දියට නොම දෙන්න ..
වැඩෙන එක ගහක මුල ..
අලු පොහොර කරලන්න ..

මම මළදාක ..
අද හෙට කෙදිනක ..
මම මතකයට නැගෙන සඳ
මදහසක් ඒවි නම් මුවගට
ඒ ඇති මට හොඳටම ...
:)





Saturday, June 1, 2013

මං ආසයි ...

හෙට ජීවත් වෙන්න තියෙන අන්තිම දවස නම් ..
මගේ ජීවිතේට ලැබුනු කෝටා එක හෙටින් ඉවරයි නම් ..
හෙට දවසත් එක්ක බහින ඉරත් එක්ක මගේ අන්තිම හුස්මත් මේ ලෝකෙන් යන්නම යනවා නම් ...

මං 
       ආ
              ස
                    යි ..

මං ආසයි පියාඹන්න.. 
වලාකුළු වලටත් උඩින්. මූණට එන හුලගට විරුද්ධව.. කුරුල්ලන්ට සම්මාන්තරව..  රාජාලියෙක් වගේ අහසේ කැරකෙන්න, වෙලාවක හුළගත් එක්ක ඔහේ හුළගට ඕන අතට ගහගෙන යන්න.පුලුං ගුලියක් තරම් හෑල්ලුවට අහස පුරාම කරක් ගහන්න.
ඔව්..
මම ආසයි පියාඹන්න..
ලෝකෙට උඩින් .. පාවෙන මල් පෙත්තක් තරම් සැහැල්ලුවෙන්.. පරිමාවක් තියෙන ස්කන්ධයක් නැති පධාර්ථයක් වෙලා ...

ෆැන්ටසි මානයෙන් එහාදි හිතලා බැලුවොත් මං ආසයි බන්ගි ජම්පින් කරන්න. මැරෙන්න කලින් එකම එක වතවක්.. අත් දෙක දෙපැත්තට දාල ගිරිය යටින් කෑගහගෙන පාලමක් උඩින් පනින්න.. වතුරේ නහය ගෑවෙන මානයක් වෙනකන් ඔහේ බිමට වැටෙන්න..
යතාර්ථවාදීව පියාඹන්න ...


මං ආසයි කැලිප්සෝ සිගර් කෙනෙක් වෙන්න. පන්කොල තොප්පියක් දාගෙන බැන්ජෝ බෙරයක් ගගහ මූදු වෙරලක් අද්දර සිංදු කියන්න. කොහේ හරි හෝටලේක මේසෙන් මේසෙට ගිහින් කෙනෙක් කැමති.. කෙනෙක් ඉල්ලන සිංදුවක් කියන්න.. සන්තෝසම්, මුදලින් නැතුව අත්පුඩියකින් හිනාවකින් ලබන්න. මම ආසයි පාරක් පාරක් ගානේ සිංදු කියන්න. පාරේ යන අයට අහන්න, ඒ අයගේ මහන්සිය කේන්තිය ආත්මාර්ථය එක මොහොතකට හරි නිමන්න .. මම ආසයි ඒ එකතු කරගන්න කීයක් හරි ගානෙන් චපාති එකක් අරගෙන ගෝල්ෆේස් එකට වෙලා රෑ එලි වෙනකන් ගිටාර් එකක් ගගහා සිංදු කියන්න මූද දිහා බලාගෙන. තනියට ඉබා ගාතේ යන බල්ලෙක් විතරක් පාමුල තියාගෙන ...


මං ආසයි රෑ දෙගොඩහරි ජාමේ කොලඹ පාරවල් දිගේ ඔහේ ඇවිදගෙන යන්න.මින්ට් පැකට් එකක් විතරක් සාක්කුවේ දාගෙන පාට ගිය ඩෙනිමකුයි ටී ෂර්ට් එකකුයි රබර් සෙරෙප්පු දෙකකුයි දාගෙන හෙඩ් සෙට් එක කනේ ගහගෙන අමරසිරි පීරිස් මහත්තයගේ සිංදු අහ අහ නිදා නොගන්න කොළඹ නගරේ නියෝන් එළි දිහා බලාගෙන පාර දිගේ යන්න.මං ආසයි ෂැංහයි බේබි පොතේ කොකෝ ටියෑන් ටියෑන්ට පේන්න නැටුවා වගේ ඒ නියෝන් එළි මැද නටන්න .. මං ආසයි බලන්න ඉන්න කාට හරි පේන්න දේදුන්නක් වගේ නටන්න.. පිස්සෙක් වගේ මහ හයියෙන් හිනා වෙවී වෙරිමතෙන් වගේ නටන්න.. ලැජ්ජාවක් බයක් සීමාවක් නැතුව ..


මං ආසයි වැස්සේ තෙමෙන්න.. සාරි වලින් බර ඇඳුම් වලින් මිදිලා නිදහසේ තෙමෙන්න..වතුර බින්දු වලට මූන හරෝගෙන ඇස් ඇරගෙන ඉන්න. අහසින් වැටෙන වතුර බින්දු කට ඇරල බීගෙන බීගෙන යන්න. මඩ වලවල් වලට පනින්න.. පාරේ රැඳිලා තියෙන වතුර ගොඩවල් වලට පයින් ගහන්න.. මං ආසයි තෙතබරියන් වෙනකන් ඇඟිලි රැලි වැටෙනකන් මහ අනෝරා වැස්සක තෙමෙන්න..


මං ආසයි පාරේ ඉන්න හිගන්නෙක් එක්ක කථා කරන්න.. පිස්සෙක් එක්ක කථා කරන්න.. මං ආසයි වත්තකට යන්න. මං ආසයි කුප්පියාවත්ත පැත්තේ වත්තක මිනිස්සු ජීවත් වෙන හැටි බලන්න. චූටි ක්ෂුද්‍ර ප්‍රාණියෙක් වෙලා කාටවත් නොපෙනී ඒ ජීවිත වල දවසක් ගෙවෙන හැටි බලන්න. මං ආසයි ගණිකාවක් වෙන්න. මිනිස්සු එන්නේ ඇඟ නිසාම විතරද කියලා බලන්න. ඇඟක් ඕන නම් ඇයි ඒ මිනිස්සු තමන්ගේ බිරිඳ පෙම්වතිය ලගට නොයන්නේ කියලා බලන්න. ඒ එන මිනිස්සුන්ට ඇඟකට වඩා දෙයක් ... ඒ අයගේ දුක අහන්න කෙනෙක්.. ඕන නිසා එනවද බලන්න.. මං ආසයි මිනිත්තු එකොළහේ කථාවේ මරියා වගේ ආදරය හොයන ගනිකාවක් වෙන්න.. විරාගයේ අරවින්ද වගේ ජීවිතයක් එක තත්පරේකට හරි ගින්නෙන් පුච්චලා අලු කරලා දාන්න. මං ආසයි සමාජයෙන් ප්‍රතික්ෂේප වෙන චරිතයක් රගපාන්න. මම ආසයි කුපාඩියෙක් වෙන්න, කාලකන්නියෙක් .. හිපියෙක් වෙන්න ... මං ආසයි ටැටූ එකක් ගහන්න.කොන්ඩේ තට්ටේ ගාන්න.. මම ආසයි මේ මුලු සමාජ ප්‍රවාහයටම විරුද්ධව උඩු ගං පීනන්න.


 මං ආසයි නිශ්ෂබ්දතාවයේ සද්දේ අහන්න. මූසල පාලු තනිකමක වෙලෙන්න. ගෙදර යතුරු දාගෙන කාගෙවත් රූපයක් හඩක් ඇහෙන්නේ නැතුව ඉන්ටර්නෙට්.. සෙල්ෆෝන්.. අයිපෑඩ්.. කේබල් ටීවි .. අනං මනං සකලවිධ ආටක නාටක ඔක්කොම වීසි කරලා මේන් ස්විච් එකෙන්ම කරන්ට් එකත් ගලවලා විසි කරලා ඇඳ උඩට වෙලා නිහඩතාවයේ හඩ අහන්න... නිහඩතාවය මගේ මොලේ ඇතුලේ අඳින රූප දිහා බලන් ඉන්න.. ඒ රූප වලට පාට පොවන්න ..


ඒ හැම දේම ඉවර වෙලා ... 
අන්තිම හුස්මට තත්පරයක් තියලා ... 
මං ආසයි ඔය පපුව උඩ මගේ රිදෙන ඔලුව නිදි කරවන්න .. 
කෝටියක් ආසවල් වලට තිත තියලා.. හිතේ නිදහසෙන්..  
ඔය හදවත බිග් බෙන් එකටත් වඩා හය්යෙන් ගැහෙන සද්දේ අහගෙන...
ඔය සුවඳින් හිත පුරවගෙන ..
ඇස් දෙක පියා ගන්න ... 

     ද
          හ
               ට
                   ම ...




Monday, May 6, 2013

තනි තටුවෙන් ....



 

 2010 ජුනි 15 ..

ඇය බස් නැවතුම්පලෙහි නොයිවසිල්ලෙන්..
එක පිට එක වැටෙන මහ වැස්සට තෙත බරිත උනු සුදු සාරිය ඇඟ වට එතී මවන රටා ඔහුගේ හොර ඇහැට පෙනෙයි..
කෙතෙකුත් ඇහැ ඉවතට ගන්නට තැතනුවද යලි යලිත් මුරන්ඩු ඇස් බැල්ම නවතින්නේ පිරුනු ළැම සහ ඒ වටා ඇඳි නේක සුකොමල නිම්න කඳු බෑවුම් අතරම වේ.
"මොන මගුලක්ද .. " ඔහු සිතයි ..
"මෙච්චර ගෑණු දැකල තියෙන මට මේ කෙල්ලගේ අඩු වැඩියට මෙච්චර කෑදර හිතෙන්නේ ඇයි .."
ඔහු ඔහු ගැනම තරහින් ..

එහේ මෙහේ දුවන ඔහුගේ ඇස් බැල්ම ඇයට වැටහෙන්නට ගත වන්නේද සුලු වෙලාවකි.
රාගයට වෙනස් වූ ආදරයක, උණුසුමක සේයාවක් ඔහුගේ නෙත තුල දැවෙනු ඇය දකී.
අද පමනක් නොව ගෙවුනු බොහෝ දිනෙක ඈ එනතුරු හොරගල් ඇහිලූ ඔහුගේ දිලිසෙන ඇසින් යුතු සොඳුරු මුහුණ දැකගැනීම, සුපුරුදු බස් නැවතුම් පොළේ ඇගේද නොකී බලාපොරොත්තුවයි.

"අද නම් කතා කරනවමයි.." ඔහු තිර අදිටනින් ..
"අදවත් කතා කලොත්.. "ඈ දෙනෙතින් ආරාධනාවෙන් ..

2011 මාර්තු 31 ..

"දන්නවද .. මම මුලින්ම ඔයාව දැක්ක දවසේ මට මතක හිටිය එකම දේ ඔයාගේ මූණයි මෙන්න මේ ලස්සන ...  " ඔහුගේ අත ඇගේ ළමැද සිසාරා දිවෙයි ..
"චිකේ වල් කොල්ලා .. "සෙනෙහසින් රතු වූ මුහුණින් ඇය ඔහුගේ පපුතුරෙහි සැඟවෙයි.
"දැකපු මුල්ම දවසේ මම හිතා ගත්තා වෙන කාටවත් මේවා අයිති වෙන්න දෙන්නම නෑ කියලා .. "ඔහුගේ අතැඟිලි දඟ පිම්මකින් ඇගේ උඩුකය පිරිමදී.
"හ්ම්ම්.. "ඇයට ඉතිරි ඒ දිගු සුසුම හෙලන්නට තරම් ශක්තියක් පමණි.
විවාහයෙන් පසු එළඹෙන සොඳුරුතම නිමේෂයට ඉඩ දෙමින් ඇය දෙනෙත පියා ගනී ..


2012 පෙබරවාරි 14 ..

"මගේ රෝස මල මට දුන්නු රෝස පොහොට්ටුවට මම ලෝකයක් තරම් ආදරෙයි .. "ඔහු දාඩියෙන් පෙඟුනු ඇගේ කෙහෙරැළි සීරුවට අතගාමින් මුමුණයි.
පැය ගානක් පුරා ඇඳුනු අනන්ත අප්‍රමාන දුක් වේදනා අතුරින් ඇගේ මුහුනේ සිනා මලක් පිපෙයි ..
"දන්නවා රත්තරං.. මම දන්නවා.. "ඈ ඔහුගේ අතක් සිප ගනී.
යාබද ලදරු තොටිල්ලේ සැතපෙන බිළිඳු අත මිට මොළවමින් කිරි වේල ඉල්ලා හඬා වැටෙයි ..
ඇය බිළිඳා ඇකයෙහි හොවා ඔහු දෙස බලයි ..
"ඔන්න ඉතිං.. ඉරිසියාව වැක්කෙරනවා මූණෙන් .. "ඇය ඔහුට සරදම් කරයි ..
ඔහු සිනාසෙයි ..


2012 මැයි 05 ..

"සමාවෙන්න.. අපිට ඒක කරන්නම වෙනවා.ජීවිතේ වැදගත් අනිත් කොයි දේටත් වැඩිය.
හිත ශක්තිමත් කරගන්න, මේ වෙලාවේ එයාට වැඩියෙන්ම ඕන කරන්නේ හිතේ නිදහස."
ඇය නිතර අඳින සාරියේ පාටම ලෝගුවක් දාගත් දොස්තර ඔහුට කියමින්..
ඔහු.. ලෝකය ගැන නිනව්වක් නැතිව හිසට ඉහලින් කැරකෙන විදුලි පංකාව දෙස බලමින් ..
ඇය... දොරෙන් එපිට සිට කඳුලු වැක්කෙරෙන මූණෙන් සියල්ලට ඇහුම් කන් දෙමින් ..


2012 සැප්තැම්බර් 06 ..

ඇය රෝහල් යහන මත අවසඟව උඩුඅතට වැතිර ..
ඇය වටකොට ගත් අනේක විධ යන්ත්‍ර සූත්‍ර වලින් නික්මෙන් මූසල හඩට සවන් යොමමින් .. ඔහේ වැක්කෙරෙන කඳුලු වැල් වලින් සුදෝ සුදු ඇතිරිලි තෙමමින් ..
ඇගේ අත සේලයින් බටයෙන් ඔද්දල්ව නිල් පාට වී ..
ඒ අත අමාරුවෙන් ඔසවාගත් ඈ හිමිහිට හිමිහිට ගෙල මුල සිට පහලට ඇගේම සිරුර ගවේශනයක යෙදෙමින් ..
එක තැනක ඒ අත නතර වී ..

අමාරුවෙන් පාට කල චිත්‍රෙකට වතුර වැඩි වෙලා බොඳ වෙලා වගේ ..
සීගිරි චිත්‍ර වලට තාර ගහලා වගේ ..
වීන්ස් පිළිමේ බිම අතෑරලා වගේ ..

කඳුලු ඇල්ල ආයෙත් අලුතෙන් ... මහවැළිය වාන් දැම්මා වගේ ..

"එයා කොච්චර ආදරේ කලාද මේ ඇඟට ..
කොච්චර නම් එයාගේ ඔලුව මගේ පපුව අස්සේ හංගගෙන ඉඳලා තියෙනවද ..
එයා .. එයා ..." ඇය සිහි විකල්ලෙන් ..
අතට හසුවන දළ මැහුම් පාරවල් සමග වෛරයෙන්, ඈ කෙරෙහිම් උපන් මහා අප්පිරියාවකින්, ඔහු කෙරෙහි උපන් දුකකින් ..

ඔහු.. හෙමීට රෝහල් කාමරයේ දොරෙන් එබෙයි.
අත රැඳි විසාල නෙලුම් මල් පොකුර මේසය මත ඇති මැටි බඳුනට දමයි.
"සුදු නෙළුම් .. කැළණියෙන්මයි ගෙනාවේ .. ඔයා ආස නිසාම .."
ඇය .. කිසිත් නොදුටු ඇසින්, නොඇසූ කනින් ..
ඔහු ඇගේ ඇඳ කොනකින් අඩමානෙට ඉඳ ගනී..
"ඔයාට කොහොමද දැන් .. සතියකින් ගෙදර යමු හොඳේ .. පුතා බලන් ඉන්නවා .."
ඔහු සිනාසෙයි ..
ඇය තවමත් ඇය වටා කිසිත් සිදුවන බවක් නොසිතමින්,ඇගේම ලෝකක .. තනියෙන් ..

ඔහු ආදරෙන් ඇගේ හිස අතගායි .. පුරුදු උණුසුමක් හිස් මුදුනින් පටන්ගෙන ඇගේ ගත පුරා දිවෙයි .. තවත් මුරන්ඩු හිතට ඉඩ දිය නොහී ඈ ඔහු දෙසට හැරී ඔහු වැළඳ ගෙන හඬා වැටෙයි..
"මේ මොකද මේ .. ඇයි මම එච්චරටම කැත වෙලාද සතියක් රැවුල නොකැපුවාම.. "
ඔහු විහිලුවක් කිරීමේ අසාර්ථක උත්සාහයක ..
ඇය ඉකි ගසමින් අඬයි ..

ඔහුගේ අත ආදරෙන් එදා මෙන්ම කොපුලත ගෙල මුල වන්දනා කරගෙන හිමි හිමීට පහළට ..
ඇය දරදඩු වෙයි..
එදා තිබුනු සුමුදු අවයවය වෙනුවට අද එතන ඇති වල ගොඩැලි ....
ඒ අත ගැටෙන ඔහුගේ වෙන විපිරියාසය .. ගෝනුස්සෙක්.. නෑ නෑ ගැරඩියෙක් අතේ ගෑවුනා වගේ අප්පිරියවාක් දැනීවි එයාට ..
ඇය සිතයි ..
අඩයි ..

ඔහුගේ අත සුපුරුදු පරිදිම නියමිත ආකරයෙන්ම හැසිරෙයි .. පළවෙනි මැහුම ඔහුගේ අත ගැටෙයි .. ඇගේ හදවත නවතී .. ඔහු ඒ මැහුම වටා මල් පෙත්තක් අල්ලන තරම් මෘදුව අතැගිලි ගෙන යයි .. දෙවන තුන්වන හතරවන මැහුම .. ඔහුගේ විකෘති වන මුහුණ දැකීමට බියෙන් තදකර පියාගත් දෙනෙත් ඈ හෙමින් විවර කරයි ..ඔහු ඇස් පියාගෙන .. මධුසමයේදිවත් ඇය නොදුටු තරමේ ආදරයකින් උණුසුමකින් ඔහුගේ මුහුණම එළිය වී .. සමනළ පියාපතක් අල්ලන තරමේ මුදු බවකින් ඇය නළවමින් ..

ඈ තනි තටුවෙන් පියාඹමින් .. 
ඔහු ඇගේ අහිමි අත් තටුව වෙමින් ..
මා ඒ ආදරය අකුරු කරමින් ..






Sunday, April 28, 2013

නූතන කිසාගෝතමි කව ....




මැරුණු ..
කුලුඳුල් පෙම ..
ලේ ගලන ..
ළමැදෙහි හොවාගෙන ..
දුවමි මම ..
ඇඳි වත ගැන ..
නිනව්වක් නැතුව ..

බෙහෙත ..
අබ මිටක් නම් ..
කිසිවෙකු නොමල ගේකින් ..
සත්තකයි ..
කිසා ගෝතමිය මෙන් ..
නැවත නොහැරෙන බව අතරමග ..
හොයාගෙන මිස ..
මළ පෙමට ..
දිවි දෙන ඔසුව ..

ඒත් ..

අනේ .. කෝ බුදු කෙනෙක් ..
මට ..
බෙහෙතක් කියන්න ...



Sunday, April 21, 2013

ලයිසන් ආදරය ...



දැන් හැදෙන එවුන් නම් ගන්න දෙයක් නෑ..
ඇටෙන් පොත්තෙන් එළියට එන්න කළින් ලව් මේනියාව..
අනේ අනිච්චේ..
අපේ කාලේ තිබුනේ නෑ මෙහෙම විගඩං..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ඒක නෙමේ ..
දන්නවද වැඩක් ..
එහා ගෙදර කෙල්ල කොල්ලෙක් එක්ක යාලුයි කියන්නේ ..
අනේ මන්දා ..
චාරයක් විලි සංගයක් නැති සක්කරවට්ටං..
මහ ලොකුවට යුනිවර්සිටි යනවා කියලා ගිහින් ඕවා තමයි කරන්නේ ..
අපි නොදන්න යුනිවර්සිටිකාරියෝ ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

අපි මේ ඔයාගෙම හොඳටයි අනේ කියන්නේ ..
ඒ කොල්ලා අමතක කරන්න ..
ඌට හැම තැනම කෙල්ලෝ ..
අපි ඔයාගේ යාලුවොනේ , ඔයාට හොඳක් වෙනවට අපි කැමතිනේ ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

අනේ එන්නෙපා මට එයා ගැන කියන්න..
එයා තවත් මගේ යාලුවෙක් නෙමේ ..
කෙල්ලෙක් ඉන්න කොල්ලෙක් පස්සෙ යන්නේ .. විලි ලැජ්ජ නැද්ද හැබෑටම ..
ආත්ම ගවුරවයක් කියලා එකක් තියෙන්න ඕන කෙල්ලෙක් උනාම..
එපා කියලා දමලා ගිය එකා පස්සෙම දුවන්නේ අඩාගෙන ..
ඔහොම එකියක් මගේ යාලුවෙක් කියන්නවත් මට ඕන නෑ ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

අමතක කරපං මචං ඒකිව..
ඒකි නැති උනාට උඹට තව ඕන තරම් කෙල්ලො හොයාගන්න පුලුවන්නේ නමන්න..
මොකෝ ඒකිගේ අහවල් එක රත්තරන්ද..
නිකන් දේව් දාස් නොවී වෙන කෑල්ලක් සෙට් කර ගනින් ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ඉක්කේයියා ..
අර බලන්නකො අර කොල්ලෝ දෙන්නා දිහා..
ගේ ද කොහෙද ..
ලැජ්ජ නැද්ද මන්ද නේද අනේ එහෙම අත් අල්ලන් යන්න ..
චික් විතරක් ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

මොකක් ..
ඒ කෙල්ලෝ දෙන්නා ලෙස්බියන් ..
දෙයියෝ සාක්කි ...
ලංකාවට ගිය කලක් ...
විලිසංගේ නැති උන් ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ඔන්න මචන් ඔය කෙල්ලව හොඳට බලාගනින්..
ඕකි යාලු බැඳපු එකෙක් එක්ක ..
වෙලාවක වචනයක් දාල බලපන්..
පත්තිනි අම්මා වගේ බිම බලාගෙන ගියාට නමාගන්න බැරි වෙන එකක් නෑ ..

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ඒයි කෙලින් බලන්නෙපා..
ෂේප් එකේ බලන්න අර කොනේ ටේබල් එකේ ඉන්න කපල් එක දිහා ..
ඒ කොල්ලා මේ දැන් කෙල්ලගේ අත කිස් කලා ..
අනේ මන්දා නේද ..
මොන කෝලම්ද මන්දා ප්‍රසිද්ධියේ ...

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

බලන්න අර ජෝඩුව ඉන්න ලස්සන ...
කසාද බැඳලා.. 

ලස්සන ගෙයක් හදාගෙන.. 
ලොකු කාර් එකක් අරගෙන..
අන්න චරිත ..
අන්න ජීවිත .. !!!!!!!!!!!


~~~~~~~~~~~~~~~~~~~~~~~~~~~~~~~~~~~~~~~~~~~~~~

ඔක්සිටෝසින් හිනා වෙනවා ...
මොකද අන්තිම කේස් ස්ටඩි එකේදි ඇරෙන්න ..
අනිත් හැම තැනදිම ..
ඔක්සිටෝසින් වැක්කුරුනේ ..
ගැලුම් ගනන් ...
ඒත් ..
ලාංකේය සදාචාරය පිළිගන්නේ ..
ලයිසමක් එක්ක එන ආදරය මිස ..
මොලෙන් පටන් ..

අරන් හදවත හරහා ගලන ..
රෝමාන්තික ආදරය නෙමේ .. !!

දෙයියනේ..
අපි කවදා ආදරය ආදරය විදියට විතරක් දකීද ...
කවුරු කාට කොහොම කලත් ...
ආදරය .. ආදරය විතරයි ..
එච්චරයි .. !!


PS. Oxytocin  is a mammalian neurohypophysial hormone that acts primarily as a neuromodulator in the brain. Recent studies have begun to investigate oxytocin's role in various behaviors, including orgasm, social recognition, pair bonding, anxiety, and maternal behaviors. For this reason, it is sometimes referred to as the "love hormone". There is some evidence that oxytocin promotes ethnocentric behavior, incorporating the trust and empathy of in-groups with their suspicion and rejection of outsiders.






Saturday, April 20, 2013

නොමියෙන ආදරය... ♥




එලඹෙන හැම රැයක ..
ඔබ දකිමි, ඔබ විඳිමි ..
මගේ ජීවිතේ ඔබේ පැවැත්ම ..
මම දැනගන්නේ එලෙසිනි ...

දුරු කතර ගෙවාගෙන ..
අප අතර ඇති වෙනස දරාගෙන ..
ඔබ ඇවිදින් මා ලගට ..
ඔබේ පැවැත්ම තහවුරු කරන්නට ..

දුරක හෝ ලගක ..
ඔබ සිටින කොහේ හෝ තැනක ..
මම දනිමි  ..
හදවත ..
තවමත් ගැහෙන බව ..

ඔබ මවෙත විවර කල දොරටුව ..
තව වරක් විවර කල මැන ..
දකිනු මැන ඔබ සිටින අපූරුව ..
තවමත් මගේ හද ගැස්ම තුල ...
මගේ හදවත ..
එලෙසටම මුමුණාවි ..
ඔබේ නම ..
සදහට ..

ආදරයේ සුමිහිරි ස්පර්ෂය ..
අප මත ගැටෙන්නේ එක්වරය ..
ඒ එක් වර ..
අවසන් වාරයද වනු නොඅනුමානය ..
හදවතට වට ආදරයේ පහස ..
අප මෙලොවින් සමුගන්නා යම් දිනක් වේද ..
එදින වන තුරු ..
අප සමග සිටිනු ඇත ..

මගේ ආදරය  ..
ඒ මා ඔබට ආදරය කල කාලයයි ..
ඔබ දරාගත්  ..
එක සැබෑ මොහොතයි ..
ඒ මොහොතක ආශ්වාදය ..
අපේම වූ ඒ මොහොත ..
මා මියෙන තුරාවට ..
මා සමග රැඳේවි ...

ඔබ මා අසලමයි ..
නෑ බියක් ලෝකට ..
විය හැකි කිසිම දේකට ..
දනිමි මම ..
මගේ හදවත ගැහෙන බව
සදහට ..

ඔබ මා ..
එක්ව ඉඳීවී මේ ලෙසට
සදාකල් ..
ඔබව රඳවා ආදරෙන්
මගේ හද ගැස්ම තුල
රැකගනිමි මලක් සේ මුදුව ..
ඒ හදවත ගැහේවි ..
සදහටම ...

...

(My translation of the song "My heart will go on" by Celine Dion)





Thursday, April 11, 2013

වසන්තයේ ආගමනය ...

සිංහල හින්දු අලුත් අවුරුද්ද ...
ජනවාරි පළවෙනිදා ලබපු කැලැන්ඩර් අවුරුද්දෙන් පස්සේ සූර්ය සන්ක්‍රාන්තියත් එක්ක එන අපේම අවුරුද්ද ..

දැන් ඉතිං රබන් සද්දේ ඇහේවි, කොහා කෑ ගහවි, මදි නොකියන්න ඔබේ තීරය පේන්න, බුරියට අඟල් බර ගානක් පහලින් රෙදි ඇඳගත්තු ගෑල්ලමයි ඔළිඳ කවි කියාවි ...

හැබැයි හැම දේම රූප පෙට්ටිය ඇතුලේ  ..

නැකතට ඇණේ කරකවලා ගෑස් ලිප පත්තු කරන, දෙමාපියන්ට කේක් පෙට්ටියක් දීලා ඉන්දියන් ක්‍රමේට වඳින, එලඹෙන නැකතින් නැකතට ගල් පොල් බෝතල් වල මූඩි ඇරෙන විපරීත සමාජයෙන් කොහා පැනලා ගිහින්.. එරබදු මලක් පිපෙන්න එරබදු ගහක් තියෙන්න එපැයි .. එරබදු ගස් වවන්නේ කොහෙද හැම බිම් අඟලක අහසක් උසට කොන්ක්‍රීට් මාළිගා හැදෙද්දි .. 

කුකරි පන්ති වල කැවුම් හදන්න උගන්නන්නේ නැතිකොට, විනාඩි පහේ ඉන්ස්ටන්ට් ආස්මි මික්ස්චර්ස් නැතිකොට අවුරුදු මේසෙට ආපිකෝ එකෙන් කැවිලි පෙට්ටියක් ගන්නවා ඇරෙන්න වෙන මොනා කරන්නද .. නැකතට රැකී රක්ෂා වලට පිටත් වෙන්නේ කොහොමද නැකත එනකන් හිටියොත් ඕටී එක කැපෙන කොට ... 

ප්‍රශ්න .. 
මිනිස්සුන්ට ප්‍රශ්න .. !!

රූප පෙට්ටිය දාගත්තු වෙලේ ඉඳන් විසූක දස්සන.. උපන්තේකට ඔළිඳ ඇටයක් ඇහැට දැකලා නැති පූල් ගහපු, බෝලිං ගිහිපු සකලවිධ රූපලාවන්‍යයෙන් සැරසුනු ගෑල්ලමයි හරි අමාරුවෙන් රෙද්ද එකලස් කරකෙන ඔළිඳ කෙළිනවා .. ෂේඩඩ් ඩෙනිම ඇරෙන්න සරමක් ඇඳගෙන අඩි දෙකක් ඇවිදලා පුරුදු නැති ඔඩෙල් මොඩල්ස්ලා සරම් ඇඳගෙන එලුවන් කනවා .. සූර්ය සංක්‍රාන්තිය කියලා හරියට කියා ගන්න බැරි නිවේදිකාවෝ කට උල් කර කර තොදොල් වෙනවා.. අවුරුදු කුමාරිගෙයි කිංග්ෆිශර් කැලැන්ඩර් ගර්ල්ස්ලගෙයි තියෙන එකම වෙනස අවුරුදු කුමාරි (තාමත්) බිකිනිය ඇඳගෙන පෙනී සිටින්නේ නැති ටික විතරයි. මේවාදැක්කම අඩන්නද හිනා වෙන්නද කියලා හිතා ගන්න බෑ .. කොහොම උනත්,අඩුමගානේ රූප පෙට්ටියේ ඇතුලෙන් හරි අවුරුද්ද බලාගන්න තියෙන එක ලොකු දෙයක්. ෆැන්ටසියක් උනත්,මොකක්වත්ම නැතුවට වඩා මොනවම හරි තියෙන එක ලොකු දෙයක්නෙ :)

කාට නැතත් වෙළෙන්දන්ට අවුරුදු. පිටකොටුව එකම මිනිස් ඔලු ගොඩකින් පිරිලා ගිහින්. ඉදිකටුවේ ඉඳලා වාහනයක් වෙනකන් ඕන දෙයක් ගන්න පුලුවන් .. හැම කඩේකම,පෙව්මන්ට් එකේ අඩියක් අඩියක් ගානේ හීන පුරෝලා..හරි ලාබයි .. මිනිස්සු මාස ගානක් හම්බ කරපු සේසත එක විනාඩියෙන් ඒ හීන අස්සේ දිය වෙලා ගිහින් ඉවරයි. ඒත් මිනිස්සු සතුටින්, ඒ හැම සතයක්ම වියදම් කරන්නේ සතුටින්, සෙනග අස්සේ තෙරපෙන්නේ සතුටින් .. 

ඒ මිනිස්සු වාසනාවන්තයි මට වඩා එක අතකට .. 
මට ඒ සතුට විඳින්න බෑ..
මට ඒ හීන අස්සේ මගේ ජීවිතේ දිය කරන්න බෑ.. 
කොටින්ම මට පිටකොටුවෙන් අවුරුද්ද සල්ලි වලට ගන්න බෑ..



අද උදේ ඉඳන් ගේ ඉස්සර පාරේ එක වාහනේක සද්දයක් ඇහෙන්නේ නෑ .. වෙනදට එක සීරුවට ඇහෙන වාහන හෝන් සද්ද කිසි දෙයක් අද නෑ..

මිනිස්සු ගමේ ගිහින් ..

කොළඹ හැමෝගම තාවකාලික නාවතැනක් විතරයි..සල්ලි හොයන්න, ජීවිත සටන ගෙනියන්න හදා ගත්තු තාවකාලික සටන් බිමක් විතරයි කොළඹ කියන්නේ .. ගහක අතු කොහේ දීපංකරේ ගියත් මුල හයි වෙලා තියෙන්නේ පොළවට.කොළඹ ජීවිතත් එහෙමයි..කොහේ කොහොම ජීවත් උනත් එක තැනකදි මුල හොයාගෙන හැමෝම යනවා .. 

හැමදාම කාර්යබහුල කොළඹ අද පාලුයි .. 
වසන්තයේ උදාවෙදි කොළඹ හිස්...


මමත් හෙට ගමේ යනවා ..
ආච්චි අම්මා මාව බදාගෙන ඉඹගනීවි.. 
රැළි ගැහුන අත් වලින් ඔලුව අතගාවි.. 
ගිලුනු ඇස් වල කඳුලු පුරෝගෙන අහවි පුතේ තවම කසාදයක් බඳින්න කල්පනාවක් නැද්ද කියලා .. නහරවැල් බේරුනු අත් වලින් කන මිරිකලා අහවි මොකෝ ළමයෝ කනේ කරාඹු දෙකක් නැත්තේ කියලා .. ඉස්මුරුත්තාවට වෙනකන් ආස්මි,කොකිස්,අතිරස කවාවි මොකෝ මේ ළමයි මේ හැටි කෙට්ටු කියලා අහ අහ..

මට තවත් එක දවසක් විතරක් වෙන අවුරුද්ද එකම එක මොහොතකට ඒ පොඩි වෙලාවට අමුතුවට දැනේවි..වෙනසක් සතුටක් දැනේවි ...

ඒ අරුනම අවුරුද්ද.. ඒ කියන්නේ අප්‍රේල් 14 කියන දිනය මට තවත් එක දවසක් විතරයි .. මගේ අවුරුද්ද ලබන්නේ මම සතුටින් ඉන්න දවසට .. මගේ සතුට අනුව එකම කැලැන්ඩර් අවුරුද්ද ඇතුලේ මගේම අවුරුදු හතර පහක් එන්න පුලුවන් වගේම එකම එක අවුරුද්දක්වත් නෑවිත් තියෙන්නත් පුලුවන් ...

දන්නේ නෑ හෙට ගැන ..
මම හොයන්නේ මොනාද කියලා මම තේරුම් ගත්තුදාට.. 
ඒහොයන දේ හම්බුන දාට.. 
මම සතුටින් ඉන්න දාට.. 
මට අවුරුදු ලබයි ... 
ඒ කවදද කියන්න මම දන්නේ නෑ ..


මොනවා කොහොම උනත්ලබන්නා වූ සිංහල හින්දු අලුත් අවුරුද්ද නෑයන්ට නොනෑයන්ට .. යාලුවන්ට තරහකාරයන්ට .. සුභ පතන්නන්ට ඉරිසියාකරයන්ට .. ආදරේ අයට ආදරේ නැති අයට .. රිද්දපු අයට සනසපු අයට .. සකල ලෝක වාසි මහා ප්‍රාණියාගේ ඉඳන් ක්ෂුද්‍ර ප්‍රාණියා වෙනකන් හැමෝටම .. හිතේ තියෙන හීන හැබෑවෙන, තව තවත් හීන මවන්න ලැබෙන්න, හැම බලාපොරොත්තුවක්ම ඉෂ්ට වෙන .. තව බලාපොරොත්තු ඇති වෙන .. සුභම සුභ සිංහල හින්දු අලුත් අවුරුද්දක් වේවා .. :)

Friday, April 5, 2013

පිණි ..






හචිං ..
මට නිව්මෝනියාව වගේ ..
හුස්ම ගන්නත් අමාරුයි ..
මැරෙයි මෙහෙම ගියොත් ..

මොකෝ උනේ ??
වැස්සට තෙමුනද  ??

පිස්සුද ..
වැස්සක් ලඟ ආවත් මම කුඩේ ඇදල අරං ඉවරයි ..
චුට්ටක් තෙමුනත් සමහන් බොනවනේ ..
දන්නවනේ මාව ..
මම සෑහෙන්න පරිස්සම් ..

හ්ම්ම් ..
එතකොට ඇයි මේ නිවුමෝනියාව ..
හුස්ම බටේ අයින් කලොත් මැරෙන තරමට අමාරු උනේ මොකද ..

ආ..
ඒ මේ පින්නට තෙමිලා ..

මොකක් ..

පින්න ..
පින්නට තෙමිලා ..

කෝ එතකොට අර කිව්ව පරිස්සම ??

කවුද දෙයියනේ පින්නට කුඩ ඉහලන්නේ??
පින්න වැටෙනව වත් දැනෙනවද .. නෑනේ ..
අනික වැස්ස වගේද පිණි වැටෙද්දි දැනෙන සනීපෙ ..
හචිං .....

අනේ තොට හොඳ වැඩේ ..
වැස්ස හැදුනු එච් 2 ඕ වලින්මයි බොල පින්නත් හැදිලා තියෙන්නේ ..
ඒ පොඩි දේ තේරුම් ගන්න බැරි මැටි මෝලෙක් ඉඳල වැඩක් නෑ ..
මැරියන් ඉතිං ..
උඩ දාගෙන .. ලැජ්ජ නැතුව තාමත් තෙමෙන ..
පිණි නිව්මෝනියාවෙන්ම .. !!





Sunday, March 3, 2013

ජීවිතේ .. උඹට මගෙන් මොනවද ඕන ?

ජී වි ... 

මට තවමත් උඹව තේරුම් ගන්න බෑ .. 
උඹව ජීවත් කරවලා මට මහන්සියි .. 
උඹ වෙනුවෙන් හුස්ම අරං, උඹ වෙනුවෙන් එලඹෙන හැම දවසකම මේ රේස් එක දුවලා මට මහන්සියි ... 
උඹට මොනවද ඕන මගෙන් ...
මට ඒක තේරෙන්නෙම නෑ ...



පොඩි කාලේ හිතුවා උඹට ඕන ශිෂ්‍යත්වේ පාස් වෙන්නයි කියලා .. ඉතිං මම ඒක කලා. ලොකු ඉස්කෝලෙකට ගියා. හිතුවා එතනින් ඉවරයි කියලා.. හිතුවා උඹ සතුටු වේවි කියලා, හිතුවා උඹ සැනසේවි කියලා .. ඒත් නෑ.. උඹ මට තවත් ඉලක්කයක් දුන්නා .. උඹ කිව්ව ඕලෙවල් පාස් වෙයන් කියලා.. නිකනුත් නෙමේ "ඒ" අකුරු පෝළිමක් එක්ක.මට වෙන තෝරාගැනීමක් තිබුනේ නෑ.. මට කරන්න තිබුනු එකම දේ උඹේ ඒ කොන්දේසියටත් යටත් වෙන එකම විතරයි.. ඉතිං මම ඔලුව නැමුවා .. උඹට ඕන දේ දෙන්න මහන්සි උනා මට පුලුවන් උපරිමයෙන්. ඕලෙවල් කලා.. හුස්මක් ගන්න ඉඩක් ලැබුනේ නෑ උඹ ආයෙම ආවා ඒ ලෙවල් ඉලක්කයක් අරගෙන .. මේ අන්තිම වතාව..අයේ කරදර කරන්නේ නෑ.. එහෙමයි උඹ කිව්වේ .. හරියට ඒලෙවල් කරගනින්.. එච්චරයි.. එතනින් එහාට ගොඩ .. මම උඹ කියපු දේ ඇහුවා.. විස්වාස කලා උඹව.. බකමූණියෙක් වගේ රැ එළි වෙනකන් පාඩම් කලා .. ෆිසික්ස් පොත් වල ලියවුනු කවි, එක පෑන් ඉරෙන් කපලා දාලා ඒ ඉඩ නිව්ටන්ට, පයිතගරස්ට දුන්නා .. දේදුන්නේ පාට අමතක කරලා එස්ටර වල කාබනික සංයෝග වල පාට කටපාඩම් කලා .. වෙනදා ලස්සන දැකපු සමනළයගේ අභ්‍යන්තර ව්‍යුහය හොයන්න ගිහින් ඒ දැකපු ලස්සන ආයේ දකින්න බැරි උනා ... 
අවුරුදු තුනක් නෙමේ..අවුරුදු පහක්ම .. ඒලෙවල් හීනයේ මම උඹ නිසා හිටියා.

අවුරුදු පහක්ම උත්සාහ කලත් ඒලෙවල් වලට උඹ දුන්නු ඉලක්කෙට මට යන්න බැරි උනා .. දොස්තර නලාව උඹට අරං දෙන්න මට බැරි උනා.උඹ මට බැන්නා, මාව නොමරා මැරුවා .. ඒත් උඹ කැමති උනේම නෑ මාව දාල යන්න ..ඇහුවා නේද මම උඹෙන් මාව දාල යනවද කියලා ?? ඇහුවා නේද මම .. ඒත් උඹ ගියෙ නෑ.. උඹට ඕන උනේ තවත් මාව මඩවන්න .. උඹේ ඉලක්කෙට මට උඹව ගෙනියන්න බැරි උන නිසා මමත් කර බාගෙන හිටියා .. පළවෙනි තෑග්ග නොලැබුනාම උඹ ඊලගට ඉල්ලුව සැනසිලි තෑග්ගක් .. මොකක් හරි උපාධියක් .. ඒකයි උඹේ ඊලග ඉල්ලීම .. ඒ වතාවේ මම දෙපාරක් නොහිතම උඹ ඉල්ලපු දේ දෙන්න හිතාගත්තා .. මොකද මම ඒ වෙද්දි උඹව අන්ත කුජීත විදිහට චාටර් කරලා තිබුනු නිසා, මම ඒලෙවල් ඇන ගත්තට උඹට ලෝකෙ රටේ හැමෝම හිනා උන නිසා.. මම මගේ උපරිමය මහන්සි උනා උඹට උපාධිය අරං දෙන්න.. එක උපාධියක් නෙමේ දෙකක්ම මම උඹට අරං දුන්නා.. 

උඹට දුක හිතුනද මම උන මහන්සිය දැකලා ?? 
ඒකද උඹ මට සතුටක් හිනාවක් ගෙනත් දෙන්න උත්සාහ කලේ ?? 
ඒකද උඹ එයාව මගේ ජීවිතේට ගෙනාවෙ ?? 
උඹට මම ගැන දුක හිතුන නිසාද .. ?? 
හිනාවක්, සතුටක්,ආදරය්ක් නොදැක්ක .. පොතින් තොර ලෝකයක් නොදැක්ක .. රොබෝවෙක් වෙලා හිටි මම ගැන දුක හිතිලද උඹ එයාව මගේ කථාවට ඇද ගත්තේ.. උඹට ඕන උනාද මට උඹව විඳින හැටි පෙන්නන්න.. විඳවපු උඹව විඳින හැටි එයා ලවා පෙන්නන්නද උඹට ඕන උනේ ...

ඇත්ත.. මට අදටත් උඹට බනින්න බැරි ඒ හේතුව නිසා. උඹ මට පෙන්නුවා මම උඹව ජීවත් කරන්න ඕන ඇයි කියලා. උඹ මට පෙන්නුව උඹව විඳින හැටි .. එයා මම හරහා උඹව ජීවත් කෙරෙව්වා, උඹව සතුටින් තිබ්බා.. එයා මට ඔප්පු කලා උඹ එක්ක ඉන්න එක අමාරු නෑ කියලා, උඹ එක්ක යාලු උනොත් දැනෙන සතුට එයා මට පෙන්නුවා.. මම උඹට ආදරේ කලා, උඹ මගෙත් එක්ක ඉන්න එක ගැන මම සතුටු උනා, උඹට යන්න නොදීපු එක ගැන මම පට්ට සතුටු උනා ...




ඒ එයා ඉන්නකන් ...

උඹ එයාව මගෙන් උදුර ගත්තා.. උඹම පෙන්නපු සතුට උඹම ආයේ ගත්තා.. මගෙන් ඇහුවෙවත් නැතුව, මට කියන්නෙවත් නැතුව.. උඹම මට පුරුදු කල රටාවකින් උඹම මාව පයින් ගහලා විසී කලා .. උඹම මට පෙන්නපු හීනෙකින් උඹම මාව කොනිත්තලා ඇහැරෙව්වා .. එයාව එක්කගෙන එද්දි තිබුනු ආදරය අනුකම්පාව එයාව ආයේ උදුරගනිද්දි උඹ ලග ගෑවිලාවත් තිබුනේ නෑ.. උඹ හරියට ප්‍රයිවට් බස් කොන්දොස්තර කෙනෙක් වගේ ආදරෙන් මාව ඒ හීනේ ඇතුලට කැන්දගෙන ඇවිත් ඊටපස්සේ කනෙන් ඇදලා එළියට විසි කලා .. මොනව උනාද  කියලා හිතාගන්නවත් මට වෙලාවක් නොදී ..උඹ හිනා උනා මට .. උඹ කෑ ගහලා කිව්ව මට, "පුලුවන් නම් ඔප්පු කරපන් පැවැත්ම .. මම උදුරගත්තා සබ්බ සකල මනාවම .. ඔන්න පුලුවන් නම් පැවතිලා පෙන්නපන් "... උඹ එහෙම කිව්වා.. මම ඔලුව උස්සන්න හදන වාරයක් වාරයක් ගානේ උඹ මට පයින් ගැහුවා.. මට හිනා උනා .. උඹ ලේසි කලේ නෑ මට කිසිම දෙයක් .. උඹ එයත් එක්ක එකතු වෙලා මට හිනා උනා, මට නින්දා කලා, අපහාස කලා ...

මට ඕන උනා උඹෙන් වෙන් වෙන්න.. 
උඹව එලවලා දන්න.. 
මම උත්සාහ කලා උඹෙන් මිදෙන්න.. 
මම දන්න විදි දෙක තුනකින්ම.. 
ඒත් උඹ මුරන්ඩුයි.. උඹ ශක්තිමත් ... එක්කෝ මම දුර්වලයි .. 
මොන හේතුවෙන් හරි උඹ මාව දාල ගියේ නෑ.. ගියේම නෑ ..




ජීව්තය ...

මට මහන්සියි ..

මට උඹ වෙනුවෙන් හුස්ම අරං මහන්සි.. 
උඹ වෙනුවෙන් කාලා මහන්සියි.. 
උඹ වෙනුවෙන් ඇවිදලා මහන්සියි.. 
උඹට ඕන දේ දෙන්න උත්සාහ කරලා මට මහන්සියි ..
මට උඹ වෙනුවෙන් ලෝකෙට පේන්න හිනා වෙලා මහන්සියි.
මට උඹේ බලාපොරොත්තු ජීවත් කරවලා මහන්සියි ..
මට උඹේ හීන ඔලුවේ තියන් ඉඳලා මහන්සි ...
මට උඹ වෙනුවෙන් බලලා මහන්සියි, අහලා මහන්සියි, විඳලා මහන්සියි .. !!

උඹ මට කිසිම දෙයක් ලේසි කලේ නෑ.. උඹ ලස්සනයි කියලා මම මගේම හිතට ඒත්තු ගන්නන්න හදන හැම වෙලාවෙම උඹ ඒ ඔක්කොම කඩා බිදලා දානවා.. මම මගේ හීන මාළිගාව වැලි ගොඩේ හදන්න හදනකොටම උඹ මහා රැල්ලක් එවලා ඒක කුඩු පට්ටම් කරලා දානවා .. මම උඹ නිසා එක මිනිත්තුවක් හිනා උනොත් උඹ ඒ හිලව්වට මාව අවුරුද්දක් අඩවනවා ... මම උඹට උපාධිය දුන්නා.. මම උඹට හොද උසස් වැදගත් රස්සවක් අරං දුන්නා .. උඹට තව මොනවද මගෙන් ඕන ..

මම හුස්ම ගන්න බෑ කියද්දි කියද්දිත් උඹ පෙනහලු ක්‍රියා කරවනවා.. 
ඒ තාලෙට හදවත ගැහෙනවා .. 
ඉතිං මොලේ වැඩ කරනවා ... 

            එතකොට මට දැනෙනවා .. 
                              මට රිදෙනවා .. 

උඹ ඒ දිහා බලාගෙන හිනා වෙනවා ...
උඹ විඳිනවා මගේ විඳවීම ...




                                ජී වි ... 

උඹට මගෙන් මොනවද ඕන ??
උඹ මාව අතෑරලා යනව නම් ..
අනේ ඇත්තමයි ..
මම උඹට ඉල්ලන ඕනම දෙයක් දෙයක් දෙනවා ..
මම පල්ලා ... !!