මම කොල්ලෙක්...
ඔන්න එක පාරට ...
ම්ම්ම්ම්.. බබා.. මම ටූට්ටන් ප්‍රශ්නයක් අහන්නද ...
දැන් ඔන්න මමයි ඔයාගේ නෝනයි පාරේ යනවා හරී.. ලොකූ වාහනයක් එනවා.. දැන් ඔයාට බේරගන්න පුලුවන් දෙන්නගෙන් එක්කෙනයි.. එක්කෝ එයාව..එක්කෝ මාව.. ඔයා කාවද බේර ගන්නේ ??
යටි හක්ක එල්ලුනා දෙපතුල ගාවට...
මොලේ ඇතුලෙන් කව්දෝ කෑගැහුවා...
දිලිහෙන ඇස් දෙක තවත් දිලිහෙන්න ගත්තා..
X ට උත්තරයක් ඕන...
මම සීරියස් මූණ දාගත්තා..
මම තෙපරබාන්න ගත්තා...
ඔටුමාමා..
උඹ මොන එහෙකටද කෙල්ලගේ හැටි දැන දැනත් ඕන දෙයක් අහන්න කිව්වේ..
දැන් දීපන්කෝ උත්තර.. මම මටම සාප කරගත්තා ...
ඒ වෙනුවට පතුලක් නොපෙනන මහා ලිඳක් වගේ ඒ ඇස් දෙක මට පෙනුනේ..
බොරුවකට, චාටුවකට ඉඩක් නෑ..
බබා මෙහෙමයි..
මම ආයේම පුරුෂ ධෛර්ය එකතු කරගෙන කට ඇරියා ...
X එයාගේ අතින් මගේ කට වැහුවා..
හීනි දිග ඇඟිලි තොලේ වැදුන ගමන් මට ඕන උනේ මේ විකාර ප්‍රශ්නෝත්තර සංග්‍රහය නවත්තලා ඒ ඇගිලි ඉඹගෙන ඉඹගෙන යන්න..
ඒත් X ගේ මූණේ තිබුනු බැරෑරුම් බැල්ම මගේ ඇතුලේ හිටි වල් සතා ආයෙම කූඩු කලා..
එක පාරට X හිනා උනා..
ආයෙත් අර හිනාව..
නෝන්ඩිය උතුරන..
මගේ කෙස් පැලෙන තර්ක වලින් තවුසන්ඩ් ටෝක්ස් වලින් හදාපු වීදුරු මාළිගාව සට පට ගාල කකුල් දෙක ලගට කඩාගෙන වට්ටලා මාව කට උත්තර නැති කරවන සීතල හිනාව ..
ඔයාගේ උත්තරේ මම දන්නවා.. ඒ නැතත් ඔයා දෙන්න ඕන උත්තරේ මම දන්නවා .. සමාජ සදාචාරයට ඔයාගේ හර්ද සාක්ෂියට අනුව ඔයා දෙන උත්තරේ මම දන්නවා... උත්තරේ නොදන්න ප්‍රශ්න මම කවදාවත් අහන්නේ නෑ.. මොකද මම කැමති නෑ එහෙම අවිනිශ්චිත ප්‍රශ්නයක් අහලා උත්තරේ ලැබෙනකන් මම විඳින වේදනාවට ... ඒ නිසා මගේ ජීවිතේ මම අහන්නේ මම උත්තරේ දන්න ප්‍රශ්නම විතරයි.. උත්තරේ ඒ කෙනාගේ කටින්ම එයාගෙම වචනයෙක් අහගන්න විතරයි මට ඕන...
මම තක්බීරි වෙලා බලාගෙන හිටියා..
ඊලගට මොනවා කරන්නද කියලා නොදැන මම පතෝල කොරටුවේ ඉන්න පඹයා වගේ ඔහේ බලාගෙන හිටියා ...
X ආයේ නෝමල් වෙලා.. ටිකකට කලින් කියපු බණ කතා කිව්වේ මේ ඇටකිති කෙල්ලද කියලා හිතාගන්න බැරි ගානට එයා පොඩි එකෙක් වගේ මගේ අත පුරාම මන්ඃකල්පිත අකුරු ලිය ලිය හිටියා හීනි දිග ඇඟිල්ලෙන් ..
විනාඩියකින් දෙකකින් X ඔලුව උස්සලා මා දිහා බැලුවා..
ටිකකට කලින් මගේ ඔලුව කාල දාල මේකි දැන් ඉන්න අපූරුව..මොකවත් උනේ නෑ වගේ ...
X එක්ක තරහ ගන්න ඕන උනත් පූස් පැටියෙක් වගේ ගුලි වෙලා ඉන්න කෙල්ලත් එක්ක කොහොම තරහ ගන්නද ... මම ලොකූ හුස්මක් පිට කලා...
තව ටික වෙලාවයිනේ තියෙන්නේ... මට ඇහෙන්න සින්දුවක් කියනවද... ඔයාට මම ගැන හිතෙන හැටි... X මගේ අත බදාගෙනම කිව්ව ...
ලාබ ප්‍රේම ගීතයක් කියලා ෂාරුක් කාන් වගේ කාමරේ වටේ නටන්නඋනත් මට පුලුවන් උනාට X ට ඕන ඒක නෙමෙයි කියලා මට තේරුනා..
මම දන්නව ඒ කට හඩ..
ඒක පට්ටම සීරියස්..
එයාට ඇත්තටම ඕන මට එයාව දැනෙන හැටි සිංදුවකින් ...
මගේ නිශ්ශබ්දතාව තේරිලා X ආයෙ මගේ මූණට එබුනා..ළඳුනේ සිංදුව කියන්න ...
මම X ගේ කට තද කරලා අල්ලගත්තා..
ගහන්න හිතුනා ඒ වෙලාවේ නම් රෝස පාට තොල පුපුරලා ලේ වැක්කෙරෙන්න..
මේක මොන විදියේ සම්බන්ධයක් උනත් ඒ විදියේ සම්බන්ධයක් නෙමෙයි..
ඇයි මේ කෙල්ලට ඒක නොතේරෙන්නේ...
මගේ හිත කේන්තියෙන් පිස්සු වැටුනා...
බබා මට රිදෙනවා ... හීනියට අඩන්න ඔන්න මෙන්න කටහඩක් ඇහුනා...
තාමත් මම X ගේ නිකටෙන් අල්ලගත්තු ගමන් නේද කියලා මට මීටර් උනේ එතකොටයි.. මගේ ඇඟිලි පාරවල් ඒ සුදු මූණේ නිල් පාටට වැදිලා තිබුනා.. කොයි වෙලෙත් චැලෙන්ජ් එකට බලන දිලිහෙන ඇස් ඒ වෙලාවෙ නම් කඳුලු වලින් පිරිලා..ඇස් පිහාට්ට අගින් එල්ලෙන් කඳුලු බිඳුව තව ටිකකින් මගේ ෂර්ට් එක උඩට වැටෙයි... මටත් අඩන්න පුලුවන් උනා නම්, පිරිමිකම පැත්තකට දාල එතනම වැටිලා අඩන්න පුලුවන් උනා නම් කියලා මට හිතුනා ... පව් කෙල්ලට රිදෙන්න ඇති ... ඒ මදිවට හොදටම බය වෙලා..උගුලක වැටුනු හා පැටියෙක් වගේ.. ඒත් ඇයි එයා කටට එන හැම මගුලම ඔහේ කියලා දාන්නේ.. එයා වගේ හැම වෙලේම කඳුලු පෙරාගෙන නොහිටියට මටත් හිතක් පපුවක් කියලා එකක් තියෙනවා නේද.. ඇයි එයාට නොතේරෙන්නේ ... ඇයි නොතේරෙන්නේ මම ආදරෙයි කියලා.. ඇයි නොතෙරෙන්නේ ඒ ආදරේ සමාජය පිළි නොගත්තත් ඒ ආදරේට නමක් නැති උනත් ඒ ආදරෙත් ලයිල මජ්නුට නැත්නම් රෝමියෝ ජුලි‍යෙට්ට දුන්නු ආදරේ තරම්ම වැදගත් කියලා.. ඇයි හැමදාම අන්තිම මොහොතේ එයා ඔක්කොම කාල දාන්නේ ...
X තාමත් මා දිහා බලාගෙන.. කඳුලු ඇල්ල එක සීරුවට කම්මුල් දිගේ ගලනවා.. මගේ හිතේ තිබුනු ඔක්කොම නපුරුකම් කේන්තිය ඒ කඳුලුත් එක්කම හේදිලා ගියා...
ඔයාට ඕන මට ඔයා ගැන හිතෙන හැටි කියන සින්දුවක් නේද...
ඔන්න අහගන්න ...
VIDEO
මම X ව තුරුලු කරගත්තා ..
ඒ හදවත ගැහෙන සද්දේ මට අහන්න ඕන ..
ඉතුරු එකම විනාඩියෙත් ....
හෙට මොනවා වෙයිද කියලා කවුද දන්නේ !!!
